Iruñea, orokorki, dexente ongi komunikaturik dago. Zernahi gisaz, sanferminetan garraioak, errepideak, trenbideak eta beteta egoten dira, batez ere asteburuetan, kanpoko jendea hurbiltzen den sasoian. Halatan, hobe duzu bidaia denboraz prestatu, festan segundu bat bera ere ez galtzeko. Seguru Viajes Arga bezalako bidaia agentzia batek lagun diezazukela. Txupinazoa, entzierroa, Pobre de mia edota zezenketak ikusteko zerbitzuak eskaintzen ditu. Asociación Navarra de Agencias de Viaje edo Viajes Tournasol bidai agentzian ere galdetu dezakezu.

Hona hemen garraioei buruzko informazioa, ordutegiak, bideak, prezioak etab. Beti bezala, poltsiko mota guztietako modukoak daude. Beraz, informa zaitez ongi, Uztailaren seian elkar ikusiko dugu eta.

Non dago Iruñea googlemaps-en?

AUTOZ BAZATOZ

Madriletik: hartzazu A-2 errepidea (autobia) Medinaceliraino; hortik N-111 Soriaraino; Soriatik N-122 Tuteraraino eta hortik N-121 errepidea edo AP-15 autobidea Iruñeraino. Autobide hori pagatuzkoa da: Tutera-Iruñea. 83 km, 7,40 € (bi alditan ordaindua). Guztira lau ordu banaz bertze (400 km inguru).

Bartzelonatik erosoena AP-2 autobidea hartzea da Zaragozaraino (Alfajarín) eta hortik Tuteraraino (AP-68). Ondoren AP-15 hartu Iruñeraino. Hiru tarte horiek pagatuzkoak dira: denetara 35,80 €. Lleidatik heldu bazara merkeagoa da 24,70 €.

Parisetiz autoz heldu bazara, hoberena duzu Irundik sartzea. Baina bidenabar turismo pixka egin nahi baduzu, beste sarbideak (Ibardin, Dantxarinea, Luzaide, Eugi) hagitzez interesgarrigoak dira. Irundik, biderik laburrena eta politena, N-121 hartzea da, Belaten barna. Baina presatua bazabiltza, hobe duzu Donostiaraino segitu eta A-15 autobidea hartzea (debalde Irurtzuneraino. Handik Iruñera, 20 km, 1,75 €). Azkarrago eta erosoago joanen zara. Irun-Iruñea autobidez: ordu bat. Belaten barna: 1,30 h.

Autoz heldu bazara, komeni zaizu zenbait gauza jakitea aparkatzea eta barne trafikoaren gainean.

ABIOIEZ

Noaingo aireportua Iruñetik zazpi kilometrotara dago. Lanegunetan Madrilerako zazpi hegaldi izaten dira eta Bartzelonarako bost, bai joateko bai etortzeko. Asteburuetan ere badira hegaldiak. Bi hiri horietatik arazorik gabe lotzen ahal da munduko aireportu nagusiekin. Iberia konpainiarekin 902 40 05 00 telefono zenbakiaren bidez egiten ahal dituzu erreserbak eta www.iberia.com, eta www.spainair.com en hobeki informatzen ahal zara.

TRENEZ

Trenez eroso etorri nahi baduzu, Madrildik eta Bartzelonatik baizik ez. Beste trenbideak konplikatuegiak edo eskasegiak dira. Madrildik (Atochako estazioa) egunero ateratzen da tren bat 7'15ean, 9'50ean, 14'10ean eta beste bat 19'30ean: hiru ordu pasatxotan egiten du Iruñerako bidea, 48,50 € pagatuta. Bartzelonatik ere egunero izaten dira trenak 7'00, 12'30 eta 22'00ean, 6 orduko bidaia. Lehenbiziko biak 32,30 € balio dute. 22'00eakoak 41,20€. Sanferminetan, jakina, lepoz egoten dira Iruñera doazen trenak. Beraz askoz lehenagotik erosi behar dira txartelak.

Iruñeko estazioa aparte samar dago, oinez ezin joateko moduan, baina autobusak baditu, merkeak, hamar bat minuturo zentrora joateko, eta baita taxiak ere. Estazioko telefonoa: 902 24 02 02 (erreserbak eta informazioa). Bertze hiri batzuetatik trenen ordutegiak kontsulta ditzakezu honako helbidean: www.renfe.es

AUTOBUSEZ

Autobus asko egoten dira egunero Madrildik Iruñera. Conda (tel. 948 22 10 26) eta txartelaren prezioa 22,82 € da. Ordutegia: 8'00, 10'30, 15'00, 17'00, 19'30 eta 1,30etan. Ostirala eta igandeetan ere autobusa bada 12'00, 14'00, 16'30, 17'30 eta 21'30etan.

Bartzelonatik ere badira, Nord estaziotik, ordu hauetan: 7'30, 15'00 eta 23'00etan. Sants estaziotik, berriz: 8'00, 15'30, 15'45 eta 23'30etan (ordu erdiko diferentzia egoten da Nord eta Santseko zerbitzuen artean). Bost ordu t´erdi inguru irauten du bidaiak. Konpainiaren izena Vibasa da (948 22 09 97).

Ez da toki problemarik izaten: konpainiek behar adina bus jartzen dituzte eskaerari abasto emateko. Hala ere, komeni da zerbait lehenagotik erostea txartela, batzutan eskaerak ustekabean harrapatu eta behar adina autobus ezin jarriz ibiltzen direlako.

Iruñea inguruko beste hirietatik ere egoten dira autobusak: Gasteiz (La Burundesa, www.laburundesa.com eta 945 26 46 26 / 948 22 17 66), Donostia (La Roncalesa, 948 22 20 79), Bilbo (La Burundesa, www.laburundesa.com eta 94 427 11 11 / 948 22 17 66), Zaragoza (Conda, www.conda.es eta 948 22 10 26) eta Santander (La Burundesa, www.laburundesa.com eta 948 22 17 66).

Iruñeko autobus geltokia zentriko samarra dago (Conde Oliveto 2). Bertan duzue Iruñeko kontsigna publiko bakarra, nahiz eta sanferminetan San Frantzisko plazara eramaten duten bertan hobekixego ibiltzeko.