Noiz dira Sanferminak?
Sanfermin festak uztailaren 6tik 14ra bitarte ospatzen dira Nafarroako hiriburuan bertan. Uztailaren 6an txupinazoa jaurtitzen da Udal plazako balkoitik eta ordutik aitzina 9 eguneko parranda giroan murgiltzen da Iruñea osoa. Hilaren 14an gaueko 24:00etan ospatzen den Pobre de mí ekitaldiarekin amaiera ematen zaie festei.

Eta entzierroak noiz izaten dira? Inon eman behar al da izena parte hartu ahal izateko?
Uztailaren 6an ez dago entzierrorik, lasterketak San Fermin egunean bertan, uztailaren 7an, hasten dira. Uztailaren 14ra bitarte egunero izaten dira goizeko 8:00etatik aurrera. Ez da inon izena eman behar. Parte hartu ahal izateko ibilbidean garaiz sartu beharra dago, ordubete lehenago edo, eta kontu handiz ibili inori bidea ez oztopatzeko eta zezenen aurrean ahalik eta finen korritzeko. Ibilbidea ezagutzea ez legoke gaizki eta horrela zein alderditan korritu nahi dugun jakinen dugu. Begirada bat ematen ahal diozue gure orriaren barrenean ageri den korrikatzeari buruzko atalari.

Eta zezenketarako txartelak nola lortu daitezke?
Egia erran, ez da lan erraza horietakorik harrapatzea, izan ere txartel gehientsuenak abonuen bidez banatuta baitaude aldez aurretik. Batenbat eskuratzeko takiletara joan behar da aurreko egunean, arratsaldeko 20,30ak inguruan (uztailaren 7ko zezenketarako 6an eskuratzen ahal dira, goizeko 10etatik 14,00etara), orduan jartzen baitituzte salmentan hurrengo zezenketaren txartelen %10a. Ordu horretan jada sekulako ilarak izaten dira eta kasu gehienetan, gainera, birsalmentan aritzen direnek hartzen dituzte lekurik onenak; gerora prezio askoz ere garestiagotan salduko dituzte eskuratutako txartel horiek. Oso litekeena da haiekin negoziatu behar izatea sarreraren bat lortu ahal izateko. Kasu eman erabiltzen dituzten trikimailuak ugariak izaten baitira.

Eta egitarau ofiziala noiz ematen da ezagutzera?
Iruñeko Udala da egitarau ofiziala argitaratzeaz arduratzen dena eta normalean bizpahiru aste lehenago aurkezten du jendartera. Kukuxumusun adi egoten gara atera bezain pronto gure web orrian sartzen. Dena dela, aurreko urteetako egitarauei begiradatxo bat ematen badiezue laster jabetuko zarete gauza askotxo berdin berdin mantentzen direla. Musika emanaldi edota ikuskizun bereziren bat izaten dira urteroko berritasunak.

Non eskuratu daitezke San Fermin lehiaketa eta Zezen Feriako aurtengo kartelak?
Egitarau ofizialarekin batera, Iruñeko Udalak San Fermin lehiaketako txartela salgai jartzen du urtero kiosko eta liburudendetan, baita Turismo Bulegoan ere. Yoar enpresa banatzaileak ere bidaltzen du jasotzean ordaintzeko 948 30 22 39 telefonora deituta edo 948 30 27 08 zenbakira faxa bidalita. Zezen Feriaren txartelaz, berriz, Misericordia etxea arduratzen da eta Vuelta del Castilloren 1goan duen egoitzan edota Sarasate pasealekuan urtero jartzen den tonbolan ere eros daiteke.

Sanferminetara lehenengoz datorren lagunak festetako zer ekitaldi ez luke galdu beharko?
Gauza aunitz dago ikusteko eta zaila da erratea zein izan daitekeen ikusteko modukoa eta zein ez, baina badira gure aburuz hagitz interesgarriak izan daitezkeen batzuk. Nonbaitetik hastekotan txupinazotik hasiko gara, izan ere hauxe baita Iruñeko jendea hainbat hilabetez irrika bizian itxaroten duen unea; Udal plazako balkoian pizten den suziriarekin hastapena ematen zaie festei. Ondoren gogora ekarriko dizugun hau apika ezagunagoa eginen zaizu eta ziurrenik noizbaiten zeozer entzunen zenuela: entzierroa. Iruñeko alde zaharreko karrikatik egunero izaten da zezenen aurrean lasterraldia, benetan hunkigarria da. Ez ahaztu gero Iruñeko karriketan barna egunero ibiltzen den erraldoi eta kilikien konpartsa; ikuskizun paregabea da, bereziki haurrentzat.

Arratsaldeetan, berriz, zezenketak izaten dira nagusi; Iruñean nahiko modu berezian egiten dira eta festetako ekitaldi aipagarrienetako bat dira, dudarik gabe. Peñak izaten dira arratsalde-iluntze parteko protagonistak, euren musika bandekin alde zaharreko karrikak girotzen dituztelarik. Zezenketaren ostean karrikadantzan irteten dira hiriaren erdigunera. Festei amaiera ematen dien ekitaldia, Pobre de mi ikuskizuna, deprimente samarra da batzuentzat eta galdu ezinekoa bertzeentzat. Hala eta guztiz ere, geroz eta jende gehiago saiatzen da jaiaren azkenengo minutuak probesten eta festa giroan ibiltzen dira 15eko goizalderarte. Goizeko 8:00etan villavesaren edota edozein ibilgailuaren aurrean korritzea tokatuko da.