Sanfermin jaiak hasteko hiru aste pasatxo falta direla, Miguel Izuk, Iruñeko zinegotzi eta Nafarroako parlamentari ohiak, "Sexo en sanfermines y otro mitos festivos" lana aurkeztu zuen atzo; sanfermin jaiek duten alderdi ezberdinen inguruko ikuspegi propioa azterketa, bitxikeri eta pasadizoen bidez kontatuta. Izurekin batera, Txema Domench liburuaren editorea eta Mikel Urmenetaren panpina egon ziren, izan ere Mikel Urmeneta, Kukuxumusuko sormen zuzendaria liburuaren hitzaurreaz arduratu baita.

Liburuak, Iruñeko udalean bost urte zinegotzi lanetan aritu zen Miguel Izuk Navarra Hoy eta Diario de Noticias egunkarietan 1992tik aitzina argitaratutako hainbat artikulu biltzen ditu. Eta horietan guztietan, liburuaren izenburuak aipatzen duen moduan, festen inguruko hainbat gai jorratzen dira: sanferminetako mitoak (Riau Riauaren berreskurapena, prozesioa, Hemigway eta atzerritarrak, etab.), sexua sanferminetan, sanferminetako tauromakia ikastaro trinkoa, antologia apokrifoa, sanfermin jaiei falta zaizkien gauzak, ohitura berriak, pertsonaiak eta protagonistak.

Liburuaren lehenengo banaketa Diario de Noticias egunkariaren bidez eginen da, 8,95 euro ordainduta (harpidedunentzat 7,95), eta hilaren bukaeran Iruñeko liburu dendetan erosi ahal izanen da.