Emakumeei bereziki eskainitako “Pamplonesas, viva Sanfermin” oihuarekin hasiera eman zien atzo Idoia Saralegui Iruñeko Udaleko zinegotziak bederatzi eguneko festei, euririk eta istilu handirik gabe Iruñeko alde zaharreko karriketan milaka lagun bildu zituen Txupinazoarekin.

Mukia minutu erdia pasatu ondoren piztu zen eta horrek zalantza uneak eragin zituen. Alabaina, azkenean, Idoia Saraleguik esaniko hitzen ondotik, eztanda egin zuen suziriak eta Iruñea ofizialki murgildu zen festa giroan, nahiz eta eguneko hasierako orduetatik parranda giroa somatzen zen hiriko hainbat txokotan. Confetti zaparrada batek, “Sanfermin, Sanfermin” oihuek eta cava oparoak eman zioten hasiera hilaren 14ra bitarte etenik izanen ez duen festari.