Festa karrikan dago eta entzierroa

Berez, Sanferminak kalean jai egitearen sinonimo dira. Ihauteri, bakanal eta parrandaren nahasketa dira, gradu askoko edarien xurgatzeaz lagundurik -bistan da-.

Festak Nafarroako patroi San Ferminen omenez egiten dira eta erlijio alderdia eta parranda basatia oso ongi bizi dira elkarrekin, eta bada bietara joaten den jendea.

Parranda, beste nonahi bezala, alkoholez, musikaz eta bakoitzak jartzen dion graziaz osatzen da. Beste sekreturik ez du. Sanferminetako parrandan ezer harrigarririk bada, bakea da: izugarrizko mozkorraldi kolektiboa bada ere, ez da gatazka askorik izaten. Baina bai, berriz, istripu franko. Urrezko araua norberak ahal bezain ongi pasatzea da eta gainontzekoei ere aukera berbera ematea da. Giroan murgiltzea bertzerik ez da egin behar. Parranda Iruñeko Alde Zaharrean biltzen da gehienbat. Zertxobait lasaiagoa bada ere, zenbait auzotan ere bada parranda. Oro har Sanferminetan edozein alde ona da lagunekin poteoan ibili eta dantzan aritzeko. Urtean zehar giroak nahiko banatzen badira ere, Sanferminetan dena nahasi egiten da eta jende guztia handik eta hemendik ibiltzen da. 

San Fermin festak nazioartean entzierroak ezagutarazi ditu, zezenak hiriko Alde Zaharreko zenbait karrikatan zehar korrika egiten duteneko lasterketak. Entzierroak uztailaren 7tik 14ra bitartean egiten dira goizeko 8.00etan. 6ko eguerdiko 12.00etan hasten dira festak txupinazoa botatzean. Egun horretan ez da entzierrorik egiten, bai parranda handia ordea. 

• .
• 1 / 6
• Festa karrikan dago >.