Trenez

Trenez erosotasun handiz etor daiteke Madriletik eta Bartzelonatik. Madriletik ibilbidea hiru ordutan egiten da Alvia motako trenekin. Astelehenetik igandera arte badira trenak Alvia 601 bezalakoak, 7:40an abiatzen direnak, eta 609 modelokoak, Iruñerantz 15:05ean irteten direnak. Egunero, larunbatetan izan ezik, Alvia 801 Madriletik abiatzen da 19:35ean. Ibilgailu hauek guztiak hiru ordu beranduago iristen dira Iruñera. Gainera, astelehenetik ostiralera, lan egunetan betiere, bada Alvia 605en errefortzu bat 10:35ean abiatzen dena. Sanferminetan, hala ere, tren gehiago jartzen dituzte martxan eta komenigarria izaten da renfek duen web orria kontsultatzea.

Iruñetik Madrilera itzultzeko badira ere abiadura handiko trenak. Astelehenetik larunbatera bitarte Alvia 802a goizeko 6:45ean irteten da; astelehenetik igandera arte 11:15ean Alvia 610 abiatzen da, eta egunero, larunbatetan izan ezik, Alvia 602 eta 606 modeloek Madrilerako bidea hartzen dute 11:15 eta 14:45ean hurrenez hurren. Estrella izeneko trena desagertzen da. Irun-Madril ibilbidea burutzen zuen eta ezaguna zen ohe-kotxea eramaten zuelako.

Tarifa: Interneten bidez erosita joaneko tarifa 49,80 eurokoa da lagun bakoitzeko turista klasean eta 75,90koa preferentean. Diferentzia horrek aparkalekua, prentsa eta gosari edo bazkaria (ordutegiaren arabera) hartzen ditu barne.

Pentsatzekoa da abiadura handiko trena martxan jartzen denean pixkanaka Bartzelona eta Iruñea arteko denbora murriztuko dela, gaur egun tarte hori nekez jaisten baita 5 ordu luzetatik. Talgo bat goizeko 7:03ean abiatzen da eta beste bat 12:30ean. Gauez, ohe-kotxea duen Estrella delako trena 22:00etan irten eta Iruñera 5:34an iristen da.

Tarifa: Talgoak 37,60 euroko kostua du turista klasean eta 49,80 preferentean lehen orduko trenetan. Eguerdikoetan prezioek pittin bat egiten dute behera: turistan 32,80 eta preferentean 43,50 eurokoak dira. Gaueko Estrella trenak tarifa preferentea besterik ez du, 42,80 eurokoa.

Bada beherapen mordo bat. Murrizketa aunitz badaude ere badago aukera txartela %60ko beherapen batekin lortzeko 15 egun aurretik eskuratzen bada. %10 gutxiago azken prezioan txartela joan-etorrikoa bada; %20 merkeago gazte-txartelarekin (26 urtetik beherakoentzat, erkidego nahiz munduko herrialde guztientzat balio duena); %40 merkeago 14 urte baino gazteagoentzat.

0tik 4 urte bitartera ez dago ordaindu beharrik eserlekurik okupatzen ez bada. 4 urtetik 14ra bitarteko bidaiariek txartela ordaindu beharko dute, beherapenak jasotzeko aukerarekin. Taldeek %25rainoko deskontua dute (10-25 lagunen taldeentzat) baina beherapenak ez dira indarrean uztaila eta abuztuan.

Iruñeko estazioa aparte samar dago, oinez ezin joateko moduan, baina euro baten truke 9. autobusak alde zaharrera eramenan zaitu. Badira taxiak, baina gutxi. Ez dira bereziki garesti ezta merke ere eta ezin da haiekin prezioa negoziatu taximetroa eramaten dutelako. Taxi geltokietan edo 948 23 23 00 telefonora hots eginez lortzen ahal dituzu.