Hortaz, zer nolako hiria dugu Iruñea, jai-denboraz kanpo? Gainerako hilabeteetan ere hain gauza apartekoa al da?

Bada egia erran, ez hainbesterako: Iruñea hiri aski arrunta da, ez oso handia (190.000 bizilagun) ez oso ttikia, Piriniotatik 50 bat kilometrora, sartaldeko muturrean.Sanferminik ez balu, oharkabean pasako litzateke: ez da berezikiederra, ez bereziki itsusia, baina bai franko atsegina: berdegune mordoa ditu (sanferminetan ostatu debaldekoa izaten dira), distantziak oso laburrak dira (edonora oinez joateko modua), hornikuntza onak ditu (nahiz beharbada kultur kontuan erren antza dabilen), bi unibertsitate ditu (beno hiru UNEDekoa kontuan hartuta): bat pribatua eta bestea publikoa, eta gainera, jakina, sanferminak ditu, zera, ez da txori kaka. Labur: franko toki ona bizitzeko.

INGURUA

Sanferminez gain, Iruñearen dohairik hoberena bere kokalekua dukezu seguraski: hiria bera nahiko normala bada ere, Iruñea ingurua, aldiz, (hots: Nafarroa) toki deigarria da benetan, batez ere bertako naturagatik: natura txit aberatsa du eta aski ongi kontserbatua. Artezaleek ere (adibidez erromanikozaleek) izango dute hemen beren grina non asea.
Eta gainera jatekoa ona da.

TABERNAK ETA MARTXA

Taberna eta martxa kontuan, sanferminak daude, jakina, zerorrek ikusteko aukera izango duzu; gainerako urtean ere aitortu behar da ongi hornituak gaudela taberna, pub, kobazulo, elkarte, soziedade eta edari-saltokien kontuan: hiriaren zenbait partetan haien dentsitatea izugarria da, batez ere kanpotarren begitan, zuek ohituta baitzaudete Km2ko taberna bat izatera. Moxkorzalea baldin bazara, beraz, Iruñea gustatuko zaizu: besterik egiten ez dakigu. Dena dela, erne: taberna asko eta martxa asko, egia, baina sanferminez kanpora ez pentsa hona etorrita Sodoma eta Gomorra aurkituko dituzunik. Hori, urtean hamar bat egunez baizik ez da izaten. Eta, gainera, orduan ere Sodoma eta Gomorra kontu hori ez da erabat egia izaten: besterik badirudi ere, sanferminetan badira zenbait portaera arau, begiratu beharrekoak.

EGURALDIA

Udan bero antza eta lehor antza egiten du, baina uztail hasieran oraindik aski freskoa izatea badaiteke (nahiko freskoa: adibidez hamabost graduz behera euri-egun batean) eta batzutan euria aritzen du. Bero sapa egitea ere badaiteke. Urtea nola den. Dena dela, gauez ez du sekulan bero handirik egiten, batez ere egunsentiko ordu gaizto horietan, seiak aldera edo hola. Orduan jendea, alkohol gehiegiak soraiotuta, hotzari antzik eman ez eta hortxe ibiliko zaizu bularreko bixarrak bistan daukazkila, ustez-eta Benidormen dagoen, antza. Gero gerokoak: bigarren edo hirugarren egunerako hasten dira hutsak, gripe, mafrundi, marranta eta afoniak direla medio. Ekartzue jertsei bat; mesede handia eginen dizue eta. Eta euritarako zerbait ere bai, badaezpada.

HIZKUNTZAK

A!, xehetasun bat: Iruñean espainiera eta euskara ditugu erabiltzen, baina besteerdaretarako nahiko moldagaitz gara: inor gutxik daki hemen ongi edo erdi ongi espainiera ez den beste erdararen bat. Euskaraz edo espainieraz ez badakizu, ongi pasako duzu, jakina, baina festaren parte eta gauza asko oharkabean pasako zaizkizu.

Ikus jakingai praktikoak denda, banku, ordutegi, diru, sarbide, aparkaleku, non lo egin, non jan, mediku zerbitzuak, putetxe, polizia, konfesore, dutxa eta gainerako kontuetarako.