da berez ikuskizun bat, baina igoal balio du: aziendaburu mordoa, espezie guztietakoak, batez ere behor azienda, eta nonahitik etorriak (Iparraldetik, Andaluziatik, Gaztelatik eta abar) hementxe elkartzen dira saldu eta erosteko. Oso polita da. Eta hemen izaten den giza azienda ere oso ikusgarria da batzuetan. Behorrik behar ez baduzu ere, merezi du feriara hurbiltzeak.

Rodezno kondearen plazan haurrentzako ikuskizunak izaten dira goizez eta arratsaldez (pailazoak, txontxongiloak, antzerkia e.a.) euskaraz eta gaztelaniaz. Horretaz gain, kiliki eta erraldoien konpartsa goizero irteten da kalegira egitera Iruñeko hainbat karriketan barna.

Zezen plazan ere izaten da zer ikusia goizetan, baina eguna zehaztea zaila da eta ordaindu behar izaten da: batzutan euskal zezenketak izaten dira, behi jokalariekin. Zezenketa klase berezi honetan salto eta jauzien bidez agertzera ematen da toreroaren trebezia, animaliari kalterik egin gabe. Beste egun batean errekortadore txapelketa egiten da, zeinean eginahalak egiten baitira zezenei eraztunak animalien adarretan paratzeko.

Zezen plazan festa kanperoa ere egiten da. Txekor batzuk askatzen dituzte, zezenzaleek torero plantak egin, pase batzuk jo eta astindu eder batzuk har ditzaten. Iruñeko zezen eskolako ikasleek ere parte hartzen dute.

Aipatu ekitaldi horietaz guztietaz gain, goizeko giroa nahiko animatuta izaten da, batik bat potea hasten den ordutik aitzina.