ENTZIERRO TXIKIA

Entzierro txikia edo entzierrilloa: bezperan, gaueko hamaikak aldera, toriatu beharreko sei zezenak aldatu egiten dira Gaseko korraleetatik Santo Dmingokoetaraino, handik hasiko baita biharamunean benetako entzierroa. Lasterkaririk gabe egiten da.

Pase bat behar da ikusteko. Iruñeko Udalaren Kultur Alorreko Descalzos karrikako egoitzan ematen dute sanfermin aurretiko egunetan. Deitu badaezpada udaleko 010 zenbakira eta zehaztuko dizute noiz banatzen dituzten. Bakoitzeko bi sarrera ematen dituzte.

Entzierro txiki honek 440 bat metroko bidea egiten du. Hasi baino minutu batzuk lehenago, polizi munizipal talde batek bidea jendez garbitzen du, eta maioralak zezentzainak banatzen. Klarin soinu batek abisua ematen du helburuko ukuilua libre dela (Santo Domingokoa). Hura entzunda, Arrotxapeko zubian zaindari batek beste soinu bat ematen du: ukuiluetako igoera ere libre da. Orduan abiatzen dira zezenak, beren zainak ondotik.

Jendeak isilik begiratzen du ikuskizuna. Kontraste gogorra goizeko entzierroarekin. Debeku da flashik erabiltzea animalien arreta ez galarazteko.

Sanferminetan lehenbiziko aldia baldin baduzu, baliteke nahikoa hotzik gelditzea ikuskizun honekin. Baina bertakoontzat aferak badu halako mistika zer bat, isiltasuna dela-ta, ilargi argia dela-ta, ez dakigu zergatik.