ZEZEN BEREIZKETA

13.00 Zezen plaza. Zezen bereizketak edo "apartadoak" hori du txarra: arratsaldeko ordu batean dela, zezenketa edo txekorketa dagoen egun guztietan, hau da, 6tik 14ra arte, biak barne. Gaueko parranda gustatzen bazaizu, kosta eginen zaizu ordu baterako esna eta ongi egotea. Halere, zezen-giroak jakinmima sortzen badizu, ahalegina egiteak igoal mereziko du .

Zezen bereizketara joateko, sarrera behar da. Sarrera plazako leihoetan erosten da (7,50 €), edozein egunetarako, goizeko hamarretatik aurrera. Apartadora sartzeko, Zaldi Patioko atea hartu behar duzu.

Apartadoko zeregina, funtsean, arratsaldean toreatu beharreko zezenak toreroen artean zozketatzea da. Gero bereizi egiten dira zezenak (entzierroaz geroztik elkarrekin daude ukuilu berean). Hiru talde egiten dira (bina zezenekoak), animalien dohai eta akatsak orekatuz. Taldeak papertxoetan idatzi, eta maioral baten kapeluan sartzen dira. Atera, eta atera diren ordenean ematen zaizkie toreroei, zaharrenetik gazteenera. Ondoren bakarka jartzen dira zezenak zein bere txikeroan, zezenketaren ordura arte trankil egoteko.

Zezen bereizketara, jakina, toreroak azaltzen dira, eta haietaz gain jende "inportante" andana bat: politikoak, artistak, zezenzale entzutetsuak. Ospakizun selektoa da, eta usain (kirats?) aristokratikoa du. Bere bezero propioak izaten ditu. Halere, bertzelako jendea ere joaten da, denetariko kuskuseroak (zerori, adibidez).

Kanpotarrentzako datu gastronomiko jakingarri bat: zezen bereizketako tabernan, tradizioz hartzen den "fino"az gain, kriadillak ematen dituzte: sanferminetako jaki zoragarrienetako (edo beste batzuen ustez nazkagarrienetakoa) bat: zezen barrabilak (bezperako zezenketakoak omen), bertako erara maniatuak.